Edimbuluko lefiku lomadipayo a nghi na nghenda otali pula ouyukineveluko – Kuugongelwa-Amadhila
رجوع
Efiku ledimbuluko lomadipayo a nghi na nghenda moNamibia kali shi ashike okudimbuluka oiningwanima i nyanyaleka oyo ya ningwa pokati komudo 1904 no1908, ashike oli na sha yo nokupula ouyuki, etambuleko neveluko loshiwana osho sha kumwa.
Eshi osha popiwa komunashipundi wOmutumba wOpashiwana Saara Kuugongelwa-Amadhila.
Momukanda wa shangwa onghela, Kuugongelwa-Amadhila okwa ti omadipayo owina Ovaherero nOvanama kepangelo loukoloni laGerman oo a eta oshinima eshi noshi li ehokololo li luluma natango mondjokonona yaNamibia.
Okwa ti eanyo loshiwana osho sha kumwa koshiningwanima eshi shiha dje pedu lasho, shiha longifwe oilonga youpika nomafininiko oukoloni ola holola omukumo neenghono odo natango di li oukwatya washo fiyo okeluwa eli.
Kuugongelwa-Amadhila okwa popya kutya nande oshiwana eshi osha kala nokudipawa omido dihapu, nokulyatelwa pedu nokutewa pomadu asho, osha pondola okukaleka po omufyuululwakalo washo ndee tashi tungulula eenghamwenyo dasho panghalafano nopapolitika.
“Omukumo wavo kakwa li ashike wongaho.
Owa pula eenghendabala da pama meenghalo didjuu neenghono,” osho a ti ngaho.
Omunashipundi okwa popya kutya edimbuluko olo alike inali wana, ta ti Namibia na twikile nokuungaunga noikumungu yomatambuleko noifuta oyo inai potokononwa.
Okwa ti eudafanotwokumwe lomudo 2021 pokati kaNamibia naGermany okwa li la holola eyokomesho, ashike omalimbililo oo kwa li a hololwa pefimbo leenghundafana natango aa pumbwa okuungaungwa nao filufilu kukwashilipalekwe ouyuki nediminafanepo.
Kuugongelwa-Amadhila okwa twa ovanyasha vaNamibia omukumo ve lihonge kombinga yomadiyo aa anyanyaleka ndee tava udu ko efimano lao mokuyukililifa ondjokonona noukwatya woshilongo.
Okwa udaneka elitulemo lOmutumba wOpashiwana mouyuki, oukwatya nekalelepo loinima, manga yo ta yandje oukwao wananghali koshiwana osho sha kumwa koshiningwanima eshi.
The post Edimbuluko lefiku lomadipayo a nghi na nghenda otali pula ouyukineveluko – Kuugongelwa-Amadhila appeared first on The Namibian.
المصدر: The Namibian