Onyati ya nyona oshidano sheengobe kOkongo

Presidente Netumbo Nandi-Ndaitwah okwa kaleka oshidano sheengobe kOmaludi Agricultural Festival konima kwa li kwa monika onyati kuhe shiivike kutya oi na oundjolowele u li ngahelipi.

Osho sha eta oumbada kutya otashi dulika i na omukufi wekondo nelaka.

Eshi kwa li ta popi pepatululo pambelewa loshivilo eshi Etitatu, Nandi-Ndaitwah okwa ti etokolo eli okwa li la kufwa opo kwaamenwe oshikondo shoimuna shoshilongo nokukelela omukifi oo tau feekelwa uha tandavele.

Presidente okwa holola kutya ina fika pefimbo koshivilo shaashi okwa kala a teelela ouyelele kovanambelewa ovo va kala tava kongo onyati ei.
“Inandi fika diva shaashi onda kala nda teelela ouyelele okudja kongudu oyo tai kongo onyati,” osho a lombwela ovanhu koshivilo ngaho.

She likolelela kuNandi-Ndaitwah, epangelo itali dulu okupitika eengobe da dja keenhele da yooloka di ongale, omanga onyati inai kwatwa nokutalika kutya oi na oundjolowele u li monghalo ya tya ngahelipi.

“Shaashi oshinamwenyo inashi monika, fyee katu shii oundjolowele washo, kashi li mondjila okutwikila noshidano sheengobe paife,” osho a ti ngaho.

Eenyati odi shiivike nawa kutya ohadi kala nomukifi wekondo nelaka unene, omukifi oo wa nyika oshiponga neenghono koinamwenyo yomakondo notau dulu okukala u na oilanduli i nyanyalifa koshikondo shoinamwenyo nokoipindi.

Ovanambelewa vokukwatela po oushitwe vati ova kala tava kongo onyati ei ya kala nokulotauka koshitopolwa oko oule woivike itatu ya pita, konima kwa li ya monika tete kOmutwewomunhu momafiku 02 Mei.

Okudja opo, oshinamwenyo osha kala nokweendaenda momikunda da yooloka moshikandjohoololo shaKongo nOshikunde, osho sha kala sha djuupaleka eenghendabala doku shi kwata neenghono.

Ekaleko loshidano sheengobe ola udifa nai ovanafaalama vamwe ovo kwa li va longekida oimuna yavo nawa ve uye va kufe ombinga, ashike vahapu ova tambula ko efimano lokwaamena oimuna moshitopolwahoololo iha kwatwe komikifi.

Omaludi Agricultural Festival otaa twikile noinyangadalwa ikwao, manga ovanambelewa voundjolowele woinamwenyo novokukaleka po oushitwe tava ninge eenghendabala dokukonga onyati nokumona kutya oi li moundjolowele u li ngahelipi.

Ovanambelewa ova indila ovanafaalama noshiwana shi kale sha tonata nokulopota meendelelo ngee sha mono oshifitukuti eshi kovanambelewa vomondjila.

Oidjemo yolukongo eli oyo tai ka eta ouyelele kutya oshivilo eshi otashi ka dula okutamukulula ko naaini.

The post Onyati ya nyona oshidano sheengobe kOkongo appeared first on The Namibian.

المصدر: The Namibian