Opoloyeka yeemiliona N$28 yokutunga ofikola koKuneneya tameka

Ewiliko loshitopolwahoololo shaKunene mEtivali ola patulula oilonga yokutunga yofikola yedina Otjorungondo Secondary School kOpuwo, yeemiliona di li N$28.

Eshi kwa li ta popi pepatululo loilonga, omukulunhu wehongo, omaduto oinima ipe, ovanyasha, omaudano, omaunghulungu nomifyuululwakalo moshitopolwahoololo Sophia Frederick, okwa ti opoloyeka ei oi li ombinga yondodo onhivali yefaneko loministeli yehongo lokukala i na ounona va yeleka keshe mongulu, i li koshi yoshipalanyole ‘Build Now for Future’.

Ofikola otai ka kala i na eengulu di li o-20, eengulu domadeulo opaunongononi womeumbo nokuhondja, eelabolatoli dounongononi neekompiuta, etungo leembelewa nongulumambo.

Frederick okwa ti opoloyeka ei oya talika ko kutya oi li ondodo yotete yofikola yomuhandjo monakwiiwa tai lalakanene okuwedela omwaalu weesekondele mOpuwo di ninge di li ngeno nhatu.

“Otwa pumbwa okulongela kumwe opo tu hange ondjodi ei. Otwa pumbwa okulikwata meenyala ndee hatu yambidida oshinima eshi,” osho a ti ngaho.

Okwa ti opoloyeka ei otai nyamukula kombwe ya kula yesekondele mOpuwo noshikandjohongo shEpupa, omanga yoo tai xwaxwameke omadeulo opaungoba neyambulepo leewino doilonga mokati kovanafikola.

Frederick okwa ti omayambukepo a yooloka omatungo moshitopolwahoololo okudja momudo 2024 aa kwatela mo okutunga eengulu dofikola di li 72, eelabolatoli nhatu dounongononi, omatungo anhe omihandjo nomatungo oundjuwo e li anhe meefikola di li 14.

Eefikola dipe odo da tungwa koshi yopolohalama ei oda kwatela mo Okapundja Primary School, Kunene Resource School Phase One, Outjo Primary Project School nOutjo Secondary Project School.

Frederick okwa holola kutya omawapaleko akula ee li metifa paife kofikola yedina Mureti High School, omanga eemboola da teelelika di ka ningwe keefikola di li 19 unene ngaa moshikandjohoololo shOpuwo Rural nEpupa.

Frederick okwa indila ehangano eli tali longo oilonga ei, NTA-K Hapu Investment, li endelelife oilonga nokukuta ovanhu vomoshitopolwa opo kukwashilipalekwe kutya opoloyeka oya yandja yo omauwa opamaxupilo koshiwana shomomudingonoko.

Ofikola yedina Otjorungondo Secondary School oya teelelika i patulule ondodo 8 no10 momudo 2027.
– NAMPA

The post Opoloyeka yeemiliona N$28 yokutunga ofikola koKuneneya tameka appeared first on The Namibian.

المصدر: The Namibian