Keshe momukunda otamu dulu okuningwa eemboola mbali – Ngurare

Omuprima minista Elijah Ngurare, okwa ti keshe momukunda otamu dulu okuningwa eemboola mbali koshi yelelo lapresidente Netumbo Nandi-Ndaitwah.

Eshi kwa li a talela po opoloyeka yoshikunino kOtjombinde moshitopolwahoololo shaMaheke, Ngurare okwa ti opolohalama ei otai nghonopeke eenghendabala depangelo dokulwifa omanyutu, okutota eemhito doilonga moitopolwa yokomikunda nokuxwepopeka onghalo yoikulya.
“Oshinima eshi otashi shiva.

Otashi dulika tuhe na oiyemo yokututwala komwedi, ashike koshi yelelo lapresidente Netumbo Nandi-Ndaitwah, okukala tu na eemboola di li mbali keshe momukunda otashi shiva,” osho a ti ngaho.

Okwa ti omboola imwe otai dulu okukala yovanhu, omanga imwe tai ningi yokuyambidida oimuna noinyangadalwa yoikunino.

Ounamapya nounaimuna, okwa ti, natango ou li umwe womoinima iheyali yepangelo ya fimana.

Ngurare okwa indila omalelo opamufyuululwakalo moshilongo ashishe a ninge osho tashi ningwa koshiwana shokOtjombinde mokuyambidida eepolohalama dombelewa yomuprima minista dokutota oikunino yoshiwana moikandjohoololo aishe i li 121.

Okwa li a enda pamwe nangoloneya Pijoo Nganate, omupedu minista womauyelele nomakwatafano opaungoba nakamusela woshikandjohoololo shOtjombinde Wenzel Kavaka pefimbo letalelepo.

The post Keshe momukunda otamu dulu okuningwa eemboola mbali – Ngurare appeared first on The Namibian.

المصدر: The Namibian