Nandi-Ndaitwah okwa koleka elitulemo lepangelo lokulonga oikulya
رجوع
Presidente Netumbo Nandi-Ndaitwah okwa koleka elitulemo lepangelo lokulonga oikulya ya wana, okutota eemhito doilonga yovanyasha nomayambukepo oshiwana pefimbo kwa li a talela po eepoloyeka da fimana dounamapya nonghalafano moshitopolwahoololo shaHangwena.
Etalelepo eli ola li limwe lomomatalelepo aye eepoloyeka dounamapya nounaimuna oshilongo ashishe, ta ende pamwe naminista Inge Zaamwani-Kamwi, minista wounamapya nounaimuna, eeshi, omeva nomatendululo omadu.
Epangelo ola yambidida opoloyeka yEkoka Brownfield Green Scheme Olomakaya.
Nandi-Ndaitwah okwa pewa ouyelele kombinga yeyambulepo lomatungo, mwa kwatelwa oluumbo la manifwa, omboola nokutula po osystema yokutekela tai lalakanene okuyambula po ounamapya.
Opoloyeka ei oya longa omahangu, omapungu,omakunde noilyavala neudo.
Noikunomwa aishe paife oya hanga okulikolwa.
“Opoloyeka oi li ombinga yeenghendabala depangelo da kula dokuyambula po ounamapya nounaimuna, okunghonopeka elongo loikulya ya wana nokutota eemhito doilonga, unene ngaa dovanyasha ovo ve li koitopolwa yokoushai,”osho a ti ngaho.
Okwa twa omukumo ovanailonga vovanyasha kopoloyeka oko va twikile nokukala ve litula mo nokulonga noudiinini, ta ti elitulemo lavo ola fimana meyokomesho laalushe lopoloyeka.
Presidente natango okwa li a talela po endiki loSan Communities Development Centre olo hali yambididwa kepangelo mEkoka.
Olo la tala unene meyambukepo leewino nekwatelemo lopaliko, li xwepopeke omaxupilo nokupitika oshiwana momudingonoko shi kufe ombinga nawa meliko.
Okwa li a pewa ouyelele kombinga yeepolohalama dokuxwepopeka eemhito opo ovayelele va dule okumona ehongo okupitila moikonga yomashangifo neepolohalama tadi lalakanene okuya kofikola ku li pombada nelitulemo.
Nandi-Ndaitwah okwa indila ovakalimo va longife eyambidido lepangelo, mwa kwatelwa eependjela nomayambidido oikulya.
Okwa londwela kombinga yelongifo nai loikolwifa nokulongifa nai eepolohalama domayambidido, ta ti kutya eliko olo li li po nali longifwe okunghonopeka onghalonawa yomomaumbo, okuyambidida ehongo lounona nokuxwaxwameka okulifikamena po okupitila moinyangadalwa yokweeta po oiyemo.
Omatalelepo ee li ombinga yeenghendabala depangelo dokuyambula po omayambulepo okoitopolwa yokoushai, okuxwepopeka omaxupilo nokunghonopeka elongo loikulya ya wana noshiwana osho tashi mono oixuna.
The post Nandi-Ndaitwah okwa koleka elitulemo lepangelo lokulonga oikulya appeared first on The Namibian.
المصدر: The Namibian