Ounona vouhamba ovo kwa li va kupulwa momeva kOmutundunguva mona omufilishisho

Oministeli youkakwashikekookanhu nonghalonawa younona otai longekida omufilishisho wounona vouhamba ovo va xupa eshi kwa li va kupulwa momeva kOmutundungu moshitopolwahoololo shaMusati Oshoondaxa shinya sha dile ko.

Momukanda wa shangwa Oshoondaxa, oministeli oya ti omukwapata umwe okwa kufa po oshinakuwanifa shokufila ounona ava oshisho.

“Oministeli oya pandula neenghono Cornelius Shimwaafeni, oo kwa li e lixupula ndee ta nukile momeva opo a xupife ounona. Ekoto laye ola kelela oshiponga sha kula,” omukanda tau ti.

Oministeli oya ti ouhamba paife ove li mefiloshisho lopakafimbo laxe nainakulu, manga tai konakona nawa oshiningwanima eshi.

Oya londwela ovanhu vaha ninge oimbuluma ngee pu na omikundu dokutekula ounona, tai dimbulukifa ovadali kutya okatendo kefiloshisho neameno lounona oka yandja eemhito dopaveta odo omunhu e na okushikula ngee i ta dulu okuyambidida okaana.

Oya fatulula kutya okaana naka fiwe nomunhu ponhele ya amenwa, naka twalwe keenhele ngaashi oitaashi yopolifi, oitaashi yokudima omindilo, oipangelo, eefikola, eenhele deameno ile momaumbo ounona ndee inaka kala ka monifwa oshiponga ile ka ningilwa omahepeko.

“Oshinima eshi osha fimana mokukwashilipaleka eameno nonghalonawa yokaana.

Ohatu indile oshiwana shi yambidide nokupukulula ovo ve li momikundu va ninge osho shi li mondjila ponhele yokupitika onghalo inaipale,” osho a ti ngaho.

Okumona omayakulo exungomwenyo, eyambidido lofamili ile okulopota oikumungu i na sha nonghalonawa yokaana, oministeli otai pula oshiwana shi dengele konomola 116 ile 106, ile opolifi ko10111.

Ounona okwa li va xupifwa kuShimwaafeni (16) oo a ti ke shii okuyowa.

Otaku tiwa okwa xupifile nale vakwao vavali odula yandja ko konima va wila mondungu eshi kwa li tava lifa.

The post Ounona vouhamba ovo kwa li va kupulwa momeva kOmutundunguva mona omufilishisho appeared first on The Namibian.

المصدر: The Namibian